मैत्री दिन

आपल्या आयुष्यात असेही काही माणसं भेटतात, निरपेक्ष व निस्वार्थ भावनेने आपलं आयुष्य घडविण्याचे कळत नकळत कार्य करत असतात. त्यामुळे आपल्या आयुष्याला आकार येत असतो. अशी माणसं आयुष्यात भेटणं म्हणजे खरी श्रीमंती होय. अशी श्रीमंती अशा मित्रांमुळे वाढत राहते. 

आमचे प्रिय मित्र, मार्गदर्शक श्री. नारायण मुदलवाड यांना काल मैत्री दिनाच्या निमित्ताने मुलांना वाचतं लिहितं करताना हे पुस्तक भेट दिले. त्यांनी काही पुस्तके विकत घेतली. त्यांच्यासोबत जिल्हा शिक्षण व प्रशिक्षण संस्थेत पाच वर्ष काम केले. या पुस्तकाच्या निर्मितीत त्यांचे खूप सहकार्य लाभले. असे मित्र सोबत असले की जीवनाचा प्रवास आनंददायी होतो.

राघुचीवाडी शाळेत रंगला कौतुक सोहळा

३१ जुलै रोजी आमच्या शाळेतील उपक्रमशील शिक्षिका आदरणीय श्रीमती रुक्मिणी बारकुल यांचा सेवानिवृत्तीच्या निमित्ताने शाळेच्या वतीने सत्कार करण्यात आला. त्याचबरोबर आमच्या शाळेतील प्रयोगशील शिक्षक आमचे मित्र योगेश कपाळे यांची शाळेतून बदली झाल्यामुळे त्यांचा सत्कार करून कृतज्ञतापूर्वक निरोप देण्यात आला. 

श्रीमती रुक्मिणी बारकुल यांनी शाळेला रंगीत प्रिंटर भेट दिला. तर श्री. योगेश कपाळे यांनी शाळेला पाण्याचे जार भेट दिले. दोन्ही शिक्षकांनी विद्यार्थ्यांच्या गुणवत्ता विकासासाठी समर्पित भावनेने कार्य केले. शाळेच्या विकासात त्या दोघांच्याही खूप मोठे योगदान आहे. 

#डायरी_राघुचीवाडी #शिक्षण #निरोप #जिल्हा_परिषद_शाळा

प्रयोगशील शिक्षकांचे गावकऱ्यांकडून कौतुक

जिल्हा परिषद प्राथमिक शाळा राघुचीवाडी या शाळेत प्रयोगशील कार्य केलेल्या उपक्रमशील शिक्षिका श्रीमती रुक्मिणी बारकुल या नियत वयोमानानुसार सेवानिवृत्त होत आहेत. तसेच या शाळेतील प्रयोगशील शिक्षक श्री. योगेश कपाळे यांची बदली झाल्यामुळे त्यांना कृतज्ञतापूर्वक निरोप देण्यात येत आहे. या दोघांच्याही सत्काराचा कार्यक्रम  उद्या शाळेत संपन्न होत आहे. त्यानिमित्ताने......

श्रीमती रुक्मिणी बारकुल व श्री. योगेश कपाळे यांनी पदवीधर शिक्षक म्हणून जिल्हा परिषद प्राथमिक शाळा राघुचीवाडी या शाळेत उत्कृष्ट कार्य केले. मुलांना गुणवत्तापुर्ण व दर्जेदार शिक्षण मिळावे यासाठी विविध नाविन्यपूर्ण उपक्रम राबविले. विद्यार्थ्यांच्या गुणवत्ता वाढीसाठी, त्यांच्या सर्वांगीण विकासासाठी शाळेत सहशालेय उपक्रमांच्या आयोजन केले. शाळेच्या भौतिक सुविधांमध्ये वाढ व्हावी, शाळा समृद्ध व्हावी यासाठी लोकसहभाग मिळविण्यासाठी प्रयत्न केला. 

श्रीमती रुक्मिणी बारकुल व श्री. योगेश कपाळे यांनी समर्पित वृत्तीने शाळेच्या विकासासाठी सदैव पुढाकार घेतला. श्रीमती रुक्मिणी बारकुल यांनी समाजशास्त्र या विषयाचे अध्यापन करताना विद्यार्थ्यांना सर्जनशील अध्ययन अनुभव दिले. त्यांनी सदैव विद्यार्थ्यांच्या हिताचा ध्यास घेतला होता.

श्री. योगेश कपाळे हे अत्यंत मनमिळावू स्वभावाचे प्रयोगशील शिक्षक आहेत. त्यांचे शाळेच्या विकासात खूप मोठे योगदान आहे. शाळेसाठी समर्पित वतीने काम करत त्यांनी मुलांना घडविण्यासाठी नाविन्यपूर्ण प्रकल्प, उपक्रम राबविले. सहशालेय उपक्रम, सांस्कृतिक कार्यक्रम, कला क्रीडा विषयातील विविध उपक्रम त्यांनी शाळेत राबविले. श्री. योगेश कपाळे हे तंत्रस्नेही शिक्षक असून तंत्रज्ञानाच्या मदतीने त्यांनी विद्यार्थ्यांना अध्ययन अनुभव दिले. शाळा भौतिक सुविधांनी समृद्ध करण्यासाठी पालकांना प्रेरित केले. श्री.योगेश कपाळे हे एक उपक्रमशील शिक्षक, व चांगले मित्र म्हणून मला माझ्या सदैव स्मरणात राहतील. या दोघांनाही त्यांच्या पुढील कार्यासाठी भरभरून शुभेच्छा.

जवाहर बालभवन येथे शिक्षण संवाद कार्यशाळा संपन्न

शालेय शिक्षण मंत्री मा.ना.श्री. दादाजी भुसे यांच्या संकल्पनेतून जवाहर बालभवन, मुंबई येथे शिक्षण संवाद ही कार्यशाळा २२ जुलै रोजी संपन्न झाली. या कार्यशाळेला मा.आयुक्त (शिक्षण), मा.शिक्षण संचालक, शालेय शिक्षण विभागातील अधिकारी,शिक्षण अभ्यासक, शिक्षणतज्ञ, प्रयोगशील शिक्षक, कला, क्रीडा विषयातील तज्ञ व्यक्ती उपस्थित होते. या कार्यशाळेला आदरणीय मंत्रिमहोदयांनी प्रेरणादायी व उर्जस्वल मार्गदर्शन केले.

अध्ययन अध्यापनातील प्रयोग आणि गुणवत्ता संवर्धन, शालेय स्तरावर कला, क्रीडा, अभिनव उपक्रम, शालेय स्तरावर सैनिकी शिक्षणाची प्रभावी अंमलबजावणी अशा विविध विषयांवर विचार मंथन झाले. जागतिक कीर्तीचे प्रयोगशील शिक्षक आदरणीय दत्ता वारे सरांनी शाळा विकासाच्या अनुषंगाने महत्त्वाचे मुद्दे मांडले. स्वयंप्रेरित शिक्षक, शिक्षण पद्धती, शालेय परिसर, शालेय संस्कृती या बाबी शाळा विकासासाठी महत्त्वपूर्ण असल्याचे त्यांनी सांगितले. कला,क्रीडा, साहित्य, संरक्षण या क्षेत्रातील मान्यवरांना ऐकता आले. राज्यातील प्रयोगशील अधिकारी व शिक्षक यांच्या भेटी झाल्या. एकमेकांचे रचनात्मक कार्य समजून घेता आले. शालेय शिक्षण विभागाने कार्यशाळेचे उत्कृष्ट नियोजन केलेले होते.

कौस्तुभची अभिव्यक्ती

कौस्तुभने गेल्यावर्षी झालेला हा निबंध. त्याच्या गेल्या वर्षाच्या जुन्या वह्या पाहताना हा निबंध दिसला. यावर्षी तो पाचवीला आहे. त्याने निबंधातून व्यक्त केलेल्या भावना, विचार मला खूप आवडले. शुद्धलेखनाच्या काही चुका आहेत; परंतु त्याने व्यक्त केलेल्या भावना महत्त्वाच्या वाटतात.