ग्रामीण भागातील विद्यार्थ्यांमध्ये वाचनाची गोडी निर्माण करून वाचन संस्कृती रुजविण्यासाठी रचनात्मक कार्य करणारे जिल्हा परिषद प्राथमिक शाळा, आळणी येथील प्रयोगशील मुख्याध्यापक बशीर तांबोळी यांचा पुस्तक फाउंडेशनच्या प्रथम वर्धापन दिनानिमित्त गौरव मानपत्र देऊन सत्कार करण्यात आला.
धाराशिव येथे पार पडलेल्या कार्यक्रमाच्या अध्यक्षस्थानी पुस्तक फाउंडेशनचे संस्थापक अध्यक्ष समाधान शिकेतोड होते. सचिव अलका शिकेतोड, संचालक भैरवनाथ कानडे आणि सेवानिवृत्त वरिष्ठ अधिव्याख्याता नवनाथ धुमाळ प्रमुख अतिथी म्हणून उपस्थित होते.
प्रयोगशील मुख्याध्यापक बशीर तांबोळी यांनी प्रशासकीय जबाबदाऱ्यांसोबतच ग्रामीण विद्यार्थ्यांमध्ये वाचनाची आवड निर्माण करण्यासाठी विशेष प्रयत्न केले आहेत. ‘समकालीन प्रकाशन, पुणे’ यांच्या सौजन्याने धाराशिव जिल्ह्यातील जिल्हा परिषद शाळांमधील विद्यार्थ्यांसाठी सुमारे १४ लाख रुपयांची उत्कृष्ट ग्रंथसंपदा उपलब्ध करून देण्यात त्यांनी महत्त्वाची भूमिका बजावली. त्यांच्या या कार्याची दखल घेत पुस्तक फाउंडेशनतर्फे त्यांना गौरव मानपत्र प्रदान करण्यात आले.अध्यक्षीय भाषणात समाधान शिकेतोड यांनी ग्रामीण भागात वाचन संस्कृती रुजविण्यासाठी समाजातील सर्व घटकांनी एकत्रित प्रयत्न करण्याची गरज व्यक्त केली. घरोघरी ग्रंथालयाची निर्मिती करून प्रत्येक घरामध्ये वाचन संस्कृती तयार व्हायला हवी. मुलांना दर्जेदार बालसाहित्य वाचण्यासाठी उपलब्ध करून द्यायला हवे. एकमेकांना पुस्तके भेट द्यायला हवी. पुस्तकांवर चर्चा करायला हवी. असे त्यांनी सांगितले.
पुस्तक फाउंडेशनच्या सचिव अलका शिकतोड सांगितले की, प्रयोगशील मुख्याध्यापक बशीर तांबोळी यांनी ग्रामीण भागातील मुलांच्या हातात उत्तम दर्जाचे बालसाहित्य देऊन वाचन संस्कृती रुजविण्याचे रचनात्मक कार्य केले आहे. ज्ञानाची नवी क्षितिजे खुली करणाऱ्या अशा प्रयोगशील मुख्याध्यापकांचा गौरव करताना पुस्तक फाउंडेशनला अभिमान वाटतो.
यावेळी भैरवनाथ कानडे यांनी वाचन संस्कृती संवर्धनासाठी सामुहिक प्रयत्नाची गरज असल्याचे सांगितले. त्यांनी मानपत्राचे वाचन केले.
कार्यक्रमास आकाशवाणीचे सेवानिवृत्त अधिकारी तानाजी शिनगारे, संदीप लेखापाल अस्मिता भातभांगे, डॉ.रुपेशकुमार जावळे, विवेकानंद कदम, नेताजी चव्हाण, दिलीप चौधरी, डॉ. रोहन आनंदगावकर, डॉ. रोहन जगताप, प्रतापसिंह खुणे, विष्णू ढेरे, प्रा.ज्ञानेश्वर पवार, शंकर मोरे, तसेच परिसरातील वाचक, साहित्यप्रेमी व नागरिक उपस्थित होते. नवनाथ धुमाळ यांनी आभार मानले.
No comments:
Post a Comment