हैदराबाद डायरी

दोन तीन दिवस हैदराबाद फिरताना छान वाटलं. मेट्रोतून प्रवास करताना तेलगू निवेदन तर पाठ झालं. तिथं फिरताना दुकानाच्या बहुतांशी पाट्या इंग्रजी व तेलगू या दोन भाषेत दिसत होत्या. फिरताना कुणाला काही माहिती विचारली तर अगदी नम्रपणे माहिती सांगत होते. संवाद साधताना भाषेची अडचण आली नाही. इंग्रजी, हिंदीतून सहज संवाद साधता आला. स्थानिक लोक मात्र एकमेकांशी तेलगूमध्येच संवाद साधतात. चित्रपटगृहात जास्त प्रमाणात चित्रपटाही तेलगू असतात 

हैदराबादमधील मराठी साहित्य परिषदेला भेट देण्याची खूप इच्छा होती.हैदराबाद मधील मराठी साहित्य परिषद पंचधारा हे त्रैमासिक प्रकाशित करते. हे मराठी साहित्य परिषद हैदराबादचे मुखपत्र आहे. संशोधनपर आणि समीक्षात्मक लेखन हे पंचधाराचे महत्त्वाचे अंग आहे.पंचधारेने जवळ जवळ बरेच विशेषांक प्रकाशित केले आहेत. त्यापैकी तेलुगू विशेषांक, दक्षिणी भारतातील स्त्री लेखिका विशेषांक, उर्दू साहित्य विशेषांक, दक्षिणी भाषा शब्दकोश, भाषाशास्त्र विशेषांक, कुमार गंधर्व विशेषांक, नरहर कुरुंदकर विशेषांक, गालिब विशेषांक आणि इतर विशेषांक खूपच छान आहेत. पंचधारेची वर्गणी भरायची होती. 

गुगलच्या मदतीनं कार्यालय शोधण्यात अर्धा दिवस गेला.शेवटी जस्ट डायलनं पत्ता पाठवला.प्रसिद्ध साहित्यिक बालाजी इंगळे सरांनीही पत्ता पाठवला. रविवारचा दिवस असल्यामुळे कार्यालयाला सुट्टी होती. खूप हिरमोड झाला. शेवटचा दिवस असल्यामुळे परत निघालो. परत गेल्यावर नक्की भेट देईल. 

हैदराबाद डायरी

गेले दोन दिवस हैदराबाद मेट्रोच्या प्रवासाचा अनुभव घेतोय.मेट्रोविषयी वाचलं होतं.कधी मेट्रोतून प्रवासात करायला मिळेल याची उत्सुकता होती.हैदराबादमधील मेट्रो खूपच छान आहे.मेट्रो स्टेशनमध्ये गेल्यावर विमानतळावर गेल्यासारखं वाटतं. सगळी संगणकीय प्रणालीवर चालणारी यंत्रणा. सगळीकडे, टापटीपणा, स्वच्छता दिसत होती.कसलाच गोंधळ,गडबड नाही.मेट्रोतून प्रवास करताना अथांग पसलेलं हैदराबाद नजरेत मावत नाही.

अथर्व साडूचा मुलगा. अतिशय शांत,मेहनती.दहावीला माझ्याकडेच होता. तो सध्या IIT ची तयारी करतोय.त्याची कोंचिग पाहण्यासाठी व त्याला इथं हैदराबादला सोडण्यासाठी आलोय.त्याचा एक मित्र इथं क्लॅटची तयारी करतोय.LLB च्या नामांकित काॅलेजाला प्रवेश घेण्यासाठी ही प्रवेश परिक्षा असते.त्याच्याकडून या नवीन विषयाची माहिती मिळाली.त्याचं संवाद कौशल्य तर फारच सुंदर आहे. त्याला हैदराबादची चांगली माहिती आहे. त्याच्या मित्रामुळं हैदराबाद फिरणं सोपं झालं.

हैदराबाद फिरताना आजूबाजूला सगळे तेलगू बोलणारेच.एखादा मराठी माणूस भेटला तर खूप आनंद होतो.काल रात्री मेट्रो स्टेशनवर एकजण भेटला. त्यांने सांगीतलं,"मी उमरग्याचा आहे". 

मग तर आपल्याच जिल्ह्यातील म्हटल्यावर खूप आनंद वाटला. बालाजी इंगळे सर माझे मित्र आहेत म्हटल्यावर तो म्हणाला, "ते माझे सर आहेत."

 साहित्यीक बालजी इंगळे सरांचा विद्यार्थी म्हटल्यावर तर अजून खूपच भारी वाटलं.तो तिथं मेट्रोतच पार्ट टाईम जाॅब करून MBA करतोय. त्याच्यासोबत खास सेल्फी काढली.